暫託（下）

我帶咗佢哋返屋企，夜晚瞓覺就困住佢哋係厠所，Shadow唔鍾意困住，成日都喵喵叫，朝早我哋起身就困Charco仔係房，比佢哋自由行，到我哋返工、 返學就困番佢哋去厠所，比Charco自由行，每日我返到屋企，第一時間就係安撫個衰仔，頭一日佢都仲係好驚，又唔食嘢，平時我返到屋企，佢聽到鎖匙聲會 o黎門口等我，嗰日唔見貓之外，仲叫極都唔出o黎，原來係我房伏係張電腦枱昅住個門口，可能佢聽到Shadow叫，所以唔敢出房，我又餵零食，餵糧比佢， 有時佢嗅到我哋有其他貓味，都會fee我哋，第二日，佢就係近門口個高架頂，昅住條走廊，第三、四日就好啲，安撫完個衰仔，就鎖住佢，去Clean-up Shadow佢哋，放佢哋自由行，Shadow除咗唔鍾意困住，佢仲成日想出門口，最慘o既係因為Shadow仲未絶育，呢隻衰仔成日週圍痾尿，真係煩， 成日都要昅住佢去邊度痾咗尿，去抺抺，唔想佢週圍痾尿，唯一o既辨法，就係成日陪住佢，比佢坐大脾，咁佢就無時間周圍去痾尿喇

睇佢係我大脾度瞓得幾舒服

係張梳化度都係瞓得咁舒服

我咪講過，我原本打算比佢哋係屋企幾日，等啲人巡完村就放番佢哋落樓下，但我發覺係唔得，因為啲貓b已經成日周圍爬出o黎，如果我放番佢哋落去，啲貓b走爬晒出個貓竇外，比啲頑童見到o既話，佢哋一定凶多吉少

我 由3月16日星期一攞佢哋返屋企，星期四娟姐上o黎我屋企睇貓貓，我話比佢知，星期五我奶奶就會返o黎，我會星期五早上放返Shadow落樓下，（因為我 唔知道我奶奶佢幾時返，有時我未放工返屋企，佢已經返咗o黎）佢一聽到就話唔好，佢都唔捨得佢再放番出街，咁佢話會星期五o黎攞佢返屋企養住先，就係咁娟 姐就攞咗個籠o黎帶咗Shadow走，（好彩嗰日我奶奶七點至返），Shadow一走，即刻去拖地，係我奶奶返o黎之前Clean-up好晒

咁 係我奶奶返o黎前，仔仔爸已經同我奶奶報備咗話放咗竇貓係屋企，不過會星期六帶走佢哋，都唔敢講之前仲有隻會周圍痾尿o既貓係度，我奶奶一返到o黎，都係 度“依依哦哦”，又話我哋多事，又咁、又咁，都無計啦，都要由得佢“哦”，因為奶奶返咗o黎，咁個竇就唔放得係厠所，唯有放係亞姐房一晚，嗰晚 Chocolate仲上床同亞姐瞓添，我奶奶見啲貓都無“爸打”到佢，都無物點出聲

星期六我要返工，仔仔爸嗰朝車我返工之餘，佢仲帶 Chocolate一家六口，將佢哋帶去仔仔爸間公司個貨倉度暫住，由仔仔爸每日返工去照顧，照顧咗佢哋幾日，都無覺好瞓，唔係因為Shadow喵喵叫嘈 住，而係可能掛心佢哋，瞓到半夜醒咗，去睇睇佢哋之後都瞓唔番，只有係張床度碌到天光，索性早啲起身放佢哋行吓，照顧佢哋幾日又減到肥都唔錯

係 貓b出世之前，娟姐已經話佢個仔有個朋友，會領養佢哋，又話要等嗰個人約咗獸醫就會o黎攞貓，仲會攞埋Shadow去，因為唔想佢哋分開，但貓b都生埋， 到依家咁耐，都唔知係唔係，嗰度又無回覆，我係唔會帶佢哋去ASPCA，因為如果佢哋都係無人領養，佢哋o既下塲，都係好似香港嗰啲咁，咁依家話晒有地方 暫時安置到佢哋，唯有見步行步，無見差唔多一個禮拜啦，我已經好掛住佢哋，每日都係聽仔仔爸講佢哋o既事比我知，無咗貓貓坐大脾都有啲唔慣，睇吓呢個星期 日，“螺”唔“螺”到仔仔爸車我去佢公司睇佢哋

呢兩日我放工係樓下見到天師，我餵佢食完乾糧佢就走，敏姐都叫我帶埋天師走，唔好得番佢一隻孤零零，我都想，不過天師o既性格，有時都好“cool”，鍾意就睬吓你，唔鍾意就越叫越走，我都無符