帶天師去絶育

仔仔爸静雞雞叫阿姐上網查吓邊個星期日，會有ASPCA流動絶育車，會係我哋屋企附近出車，後來查到10月18日會有，原本打算10月17日至帶天師返屋 企，因為怕佢會周屋射屎，（因為之前Shadow o黎我屋企就周圍射屎），但10月15日開始個天就落雨，仲會落幾日，因為驚天師會比雨淋親會病，會影響佢絶育，所以決定早啲帶佢返屋企，一返到屋企，就跟手同佢沖咗個涼，但都係沖得唔夠子細，因為佢不停咁郁，佢啲指甲又未剪，搞到我同仔仔爸都比佢抓損晒，不過呢隻衰豬真係好乖，無周圍射屎，都識去沙盤疴 尿，第一晚困係厠所又無喵喵叫，真係好抵錫，之後仔仔爸同佢剪指甲，佢除咗郁o黎郁去比較難剪之外，起碼佢唔會好似Charco仔咁，又fee、又咬，就 係呢幾樣咁乖o既舉動，軟化咗仔仔爸o既心，比佢留係度

除咗第一晚困厠所，第二晚開始就upgrade瞓阿姐房

到咗10月18日，我哋晨咁早就出發去排隊，嗰日又落雨，天師都算乖，係個籠度郁咗一陣，喵咗一陣，去度見到有十個人度排緊隊，點知架流動車，泊咗去隔離街 街口，到我哋知道，走過去，又已經有好多人排隊，因為佢哋一日只收二十幾隻貓、狗，變咗無我哋份，無計喇，唯有下個星期再去過，但下個星期o既地點係喺 Bronx，都無法啦，遠啲都要去，快啲同天師絶育，就可以早啲放佢出o黎，唔駛成日困佢係房

10月25日，又係天未光，就去Bronx 排隊，嗰朝天氣幾好，又唔算好凍，我哋排第七，之前有人帶兩隻狗，所以我哋都係第九隻動物，由天未光，等到天光，架流動車至出現，填好晒表，交低天師比護士檢查，護士仲話天師好大隻、好handsome添，佢真係好大隻o架，佢有成11磅

大約兩點幾，佢哋就call我哋話可以去接番天師，咁我哋即刻飛車去接佢，去到見到天師帶住個喇叭，但無幾耐，天師係個籠度不停咁掙扎，咁啲護士就幫佢除咗 個喇叭，教我哋返到屋企困佢係房比佢冷靜吓，返到屋企放佢係房，驚佢會舔傷口，就幫佢帶喇叭，點知佢又發晒癲係咁郁，仲週圍撞，好驚佢又整親個傷口，就幫 佢除咗個喇叭，我就成日都係房陪住佢、睇實佢，我覺得個醫生啲手勢好好，個傷口好細，見係咁，佢唔帶喇叭都應該無問題

好多時我唔比佢舔傷口，天師就唔舔，佢真係好乖，由嗰日開始我就係阿姐房陪天師瞓咗一個禮拜，（阿姐頂唔順天師啲“唔唔“好臭，情願瞓廳）

係天師困房期間，間中都有放佢出房行吓，但要困住Charco仔係我奶奶房

一係Charco仔“捕”住房門口

一係天師仔“捕”住房門口

做物“捕”住，咪係玩以下呢個囉

我返屋企見親佢多數都係喺度攤抖，我諗佢都幾悶，不過有時放佢出房行吓，佢行一陣就自己返房上床瞓

下次會講吓佢兩隻仔接觸係點