家庭集會

上個星期日，因為要辦一件家庭事件，所以叫阿姐返紐約一趟，原本只要阿姐自己到某地點出現就可以，但阿姐話想返屋企，所以星期五佢早啲收工就揸車返嚟，佢搵到位泊好車，就去咗老番士多買六合彩，比佢見到士多隻貓

我已經開好晒飯等佢返嚟食，一食飽飯，天師仔就走去黐住阿姐，陪阿姐煲劇

 奇哥仔同Chewy 都係附近

後來Marble 仔又去黐阿姐

星期六阿姐難得肯早起床，仲陪我去洗衫，Mango 仔昅住阿姐去厠所洗面刷牙

我去洗衣舖收衫，阿姐等我返嚟，阿姐就去騷擾Mango 仔，佢要影多啲相比Mango 仔啲fans 睇

我返嚟執好啲衫，就出去行街陪阿姐買嘢，我哋去咗St. Mark 食lunch，依家紐約唔比堂食，好多餐館都係舖外搭帳篷用餐，我哋食日本嘢

陪阿姐買齊嘢就返屋企餵貓，等仔仔爸返嚟，我哋要去Flushing，幫貓地入貨，之後就去搵嘢食，係夜晚見到啲舖外用餐區，好鬼有情調

我哋揀咗食馬拉餐

到星期日一早，我見到Marble 仔一早已經上床陪住阿姐，後來Chewy 仲走埋上床要佢阿娘摸佢，Chewy 真係好sweet，阿姐仲話半夜時，Mango 仔上床陪佢瞓

食仔仔爸整嘅早餐，仔仔爸出咗去買嘢，我就放好幫貓地入咗貨啲罐罐，Minnie 呢個袋控，一見我打開個環保袋，又即刻攝咗入去

之後我執晒裡面啲罐罐出嚟，就交個袋比阿姐，叫阿姐帶埋佢返屋企

之後又見到Minnie 又匿係個袋底度，以為無人見到佢嗎，哈哈

等埋仔仔爸返嚟，我哋就要出門，出門前阿姐要執番啲嘢走，Mango 仔又要八阿姐啲嘢，我叫Mango 仔入去啦，跟阿姐返屋企啦

係5 月時，我叔仔因腸癌擴散過咗身，因為疫情關係，當時都係得幾個兄弟姊妹搞咗個好簡單，無朋友觀禮嘅葬禮，身處外州嘅姑奶同阿姐，都叫佢哋唔好返嚟，因為呢個疫情，火葬後啲骨灰，都要等呢排疫情無咁嚴重時至下葬，所以約咗呢個星期，叫埋大家一齊出席叔仔嘅下葬儀式，呢個墓園環境好靚，我老爺奶奶都係葬係呢度

儀式辦妥，大家就各至返屋企，亦都要同阿姐話別，如無意外，阿姐月尾至會再返嚟，同我預早慶祝生日，食餐提早嘅生日飯

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講番上次同阿姐食完嗰餐海鮮餐，打包咗食剩嘅龍蝦，後來我剝咗殼蒸熱做餸，

Charco 仔一嗅到，即刻又埋枱等開餐 

不過仔仔爸話有鹹味，唔可以比佢食，Charco 仔有得睇但無得食，真係好慘慘豬

另外原來呢一篇係我第1000 篇，寫Blog 咁多年，又要唔懶keep 住寫，都真係唔容易