好驚佢唔食

依家天師仔仍然好大食，但佢一粒乾糧都唔食，依家佢每日起碼食三罐細罐頭、黃昏食雞胸肉，有時仲要加湯包，有時可能食厭，要哄吓至肯再食少少

有兩日，見天師仔胃口麻麻，好似食唔落，但佢又想食，會扭食

見佢肉泥罐頭再加吱吱醬都唔食，試吓整雞肉畀佢，佢又唔食，後來仔仔爸話開佢鍾意食魚蝦肉罐畀佢，好彩佢又肯食，之後黃昏餐雞肉佢又肯食，跟住佢胃口又好番晒，每日又繼續食、食、食

每次我都係畀少少、畀少少咁餵佢，食完佢仲想添食，會好緊張，用頭仔high 我隻腳，催我畀佢

呢隻罐頭佢依家每日下午都要食一罐，因為早排無貨，見有貨我都要入定幾pack 畀佢，佢實在可以食好多，我有時唔想佢一次過食太多，會唔理佢，佢自己就係度等

 

 等唔到就自己攤抖吓

 

直至佢主動嚟搵我攞食

 

 

佢依家啲血膿，多數都係眼眶度流出嚟

見佢流血膿，我平時只敢用濕毛用“印”走啲膿，所以佢眼眶附近啲毛會比較污糟，仔仔爸係度至幫佢抺乾淨面上、手仔啲污穢，佢依家都唔會自己理毛，啲毛有時會結埋一舊舊，仔仔爸就會幫佢梳吓毛

畀爸爸抺乾淨，靚仔好多

近排見天師仔鍾意瞓係呢張地毡度

咁我又將個書包換轉係嗰個位置

個書包成日畀佢啲血膿整污糟，我要成日清洗

但有時又唔瞓書包，走番嚟瞓地毡

呢排唔知係咪天氣熱咗，佢都少咗瞓籐籃

佢呢排仲鍾意瞓係砂盤，仲會成晚瞓係個砂盤度，都唔知點解係咁，依家我臨瞓前，都會清一清個砂盤

我唔怕佢食窮我，唔怕佢唔肯食嘢，希望佢繼續食、食、食