4貓Ｂ絶育了

睇住芝麻、花生、黃糖、黑糖一日一日咁成長，佢哋一齊長大，感情一定好好，成日都一齊玩、黐埋一齊瞓

如果四隻都係同性別，我都唔駛咁緊張佢哋絶育嘅問題，但有芝麻呢粒女係度，就要緊張啲，因為聽講貓仔未夠半歲就可以令貓女懷孕，貓女就半歲就可以懷孕，好驚佢哋會搞出貓命

見啲仔對芝麻做埋呢啲動作，其實都唔知係玩定真係想曳曳，又見黃糖成日舔自己嗰度

以前我哋會去ASPCA 啲流動絶育車度絶育，要上網Check 地點，又要天未光就去排隊，不過依家已經無呢支歌仔唱，依家要上網排期，起碼要排4、5個月，排得嚟又驚搞出貓命，又唔想只困住芝麻，我姑仔好努力幫我上網搵啲絶育嘅地方，收費要唔好太貴，因為一般私家診所，絶育費起碼要$800 - $1,000，後來我姑仔搵到間非牟利，收費好平嘅地方，都要約咗成個月

絶育前幾日，我已經放定啲貓籠係房，令啲貓B 見慣就無咁有介心

之前一晚要禁食，我哋都唔想困佢哋係房一晚，唯有收埋啲乾糧，9 貓一齊禁食，一早起身先困4 貓係房，等我哋餵咗啲大貓、食埋早餐，臨出門口前至引佢哋入籠，最擔心係怕難捉黑糖，因為佢最怕人，怕佢一搵到地方匿埋就好難捉佢，點知當我入房時，見佢已經自己走咗入個細籠度，黃糖就伏咗係籠頂同佢玩，咁我就梗係第一時間閂埋門啦，花生同黃糖就扮我畀嘢食佢哋引佢哋入大籠，芝麻就另外捉佢入貓袋

帶佢哋落街、上咗車，芝麻、黃糖、黑糖，一隻貓叫、另一隻又叫，一路行、一路三重奏

絶育嘅地方係一間Cat Cafe，絶育費係男仔就$90，女仔就要$110

啲貓都未瞓醒

已經有人係度等緊

要到7 點至去接佢哋

接佢哋時候，見到籠裡面放咗啲濕糧，不過佢哋無食到

佢哋應該好肚餓，好快就肯食啲濕糧

咁少邊夠食，梗係要再添多啲畀佢哋

見佢哋好快就好似無事一樣，去飲水，仲未夠飽就食乾糧

但見芝麻就不停咁舔傷口

所以仔仔爸攞咗個護膝，剪開當衫畀佢著住，等佢無咁容易舔傷口，都畀佢著咗 5 日

啲仔個pat pat 剃咗啲毛，好似馬騮屎忽，哈哈

依家佢哋絶晒育，我真係安樂晒