加州尋貓之旅 — 出發

早幾個月前，阿姐話8 月搵地方同我去旅行，但成個8 月份，見阿姐都無聲無氣，諗住都應該去唔成，點知9 月頭，阿姐問我仲去唔去，我梗係磥飯應啦，咁阿姐即刻Book 機票、住宿同租車

上個星期一阿姐一收工就自己搭火車返嚟，第二日我哋搭中午機，但費事要仔仔爸請假車我哋去機塲，所以第二朝早啲起身，我餵埋貓地，係屋企食埋早餐

就去搭Subway 再轉Air Train 去機塲，我都係第一次自己搭車去機塲

呢啲廉航機無飛機餐供應，所以先買個Donut 頂吓肚先

一落機先去租車公司攞車

飛咗6 個鐘已經勁肚餓，阿姐之前search 見有個海鮮拼盤好似好正，就揸車嚟呢度試吓

呢個Fish Market 近海邊，可以係某啲餐廳買咗嘢食，出去室外，一邊睇海，一邊食

終於搵到係呢間餐廳食嗰個海鮮拼盤

佢哋有自己個魚檔，證明啲嘢都好新鮮

個沙律汁酸酸哋，幾口味

個龍蝦就焗過火咗少少，個粟米面灑咗啲辣粉，好鬼辣，而且都開始飽，放棄咗

S'mores、Sundae 個前主人，之前同阿姐講過話佢上次去加州，係住民宿，仲住著一間有養貓嘅民宿，所以阿姐今次専搵啲有貓嘅民宿嚟住

一入屋就見到有貓，隻貓叫Louie

我哋住嗰間房

厠所就要同屋主share，個厠所好大、好靚

Louie 唔怕生，仲好黐人，好嗲，阿姐抱咗佢上床，之後仲唔願走

仲陪住我哋瞓

直至佢聽到屋主返嚟至返出去，到半夜四點，我聽到房外有貓聲，我就出去睇吓，發現有另一隻貓係度

後來我哋返房瞓，之後Louie 跳上床尾，阿姐就抱佢係我哋腰中間位置，Louie 就一直陪住我哋瞓覺，直至我哋瞓醒，Louie 真係好sweet 呢

第二朝瞓醒見到屋主人，主人話隻黃貓係住係對面，係Louie 個女朋友Pandora 個brother，叫Conan，平時屋主係唔會閂門，所以佢哋可以自由出入，我哋去到民宿時，屋主仲係去咗街未返嚟，我哋係自己係後yard 開閘泊車入屋

我哋走嘅時候，Louie 仲送我哋出門呢，佢咁鬼sweet，好唔捨得佢呢

 待續…