湊貓B — 1

仔仔爸做嘢間公司，個貨倉有隻貓女，係附近啲舖頭畀佢老細，但佢老細一直都無照顧隻貓，連食物、水都無，好彩有個西班牙工友，有攞乾糧餵佢，每個星期六，仔仔爸都會帶乾糧收工前放多啲畀佢，怕星期日公司無人佢會無嘢食

上個月仔仔爸聽個西班牙工友講，話貓女生咗四隻貓BB，不過仔仔爸一直都無見過，仔仔爸聽見貓女生咗BB，應該要食多啲嘢至夠奶水餵貓B，所以開始每日攞罐頭返去餵貓媽媽，貓媽媽已經見慣仔仔爸放食物畀佢，每次見到仔仔爸都會出嚟討食

終於見到啲貓B，原來已經大到可以自己食罐頭， 仔仔爸話貓媽好偉大，仔仔爸放低罐頭行開幾分鐘，返去唔咗兜罐頭，原來貓媽媽撥入架底畀啲貓B 食先

我聽見仔仔爸話貨倉有貓B，已經諗又多幾隻流浪貓，真係好慘，仔仔爸都覺得係，所以佢決定帶啲貓B 返嚟，試吓搵人收養、或者送佢哋去Shelter

上個星期五攞定貓籠、貓袋出嚟，隻Mango 仔主動入籠

星期六仔仔爸捉咗兩隻貓B 返嚟，係襯貓B 食罐頭時捉，話呢兩隻為食至捉得到，一隻係黃貓，另一隻係玳瑁貓

第一時間就係入厠所沖涼，佢哋驚到不得了

玳瑁貓沖涼好乖，黃貓初時都發脾氣，但後來見佢沖都好舒服，真係比佢笑死

兩個抺身、吹毛都好乖，仲同佢哋剪埋指甲

 

搞掂晒，先放入個大籠度，驚佢哋匿入床底

之後放佢哋出嚟，知道佢哋一定匿入床底，放低啲糧水畀佢哋，都唔敢打搞佢哋，等佢哋自己休息定吓驚，第二朝入房見到佢哋

有出嚟食晒啲嘢同便便，不過都發現佢哋係其他地方大便，應該仲係驚

平時星期日，仔仔爸會出去買定啲日常早餐、買吓生果返嚟，我就會成日都唔出街，呢日我同佢一齊出門口，我就去買貓仔乾糧，我買完就join 仔仔爸去Food Court 食個快飯

佢哋都係鍾意食濕糧多啲，啲罐頭好快清碟，不過佢哋都肯食乾糧

到星期一，我嘗試引佢哋出嚟食濕糧，佢哋果然係“吃貨”，好快都唔怕我係度都走出嚟食

食完仲識飲水，好叻叻

其實佢兩個都算大胆，自從見我係度睇佢哋食嘢之後，都已經無咁驚，我打開房門，見到黃貓仔瞓係張貓床度好歎，佢見到我都無走貓

Chewy 母愛發作，佢聽到啲貓B 係度叫，會走去房門度聽

我send 貓B 相畀阿姐睇， 雖然啲貓B 未必我自己養，始終貓B 有個名會好一啲，阿姐就叫玳瑁貓B做芝麻，黃貓B 做湯圓，不過我覺得湯圓唔係太貼切，叫佢做花生