Charco仔唔舒服

之前講過Charco 仔依家只會匿係房，除咗食乾糧、飲水、去厠所只會行出房，上個星期開始留意到佢除咗去厠所、飲水至出房

一直罐頭餐都係攞入房畀佢食

見佢出廳都唔食乾糧，所以每隔啲時間攞乾糧入房餵佢

上個星期開始見餵佢食乾糧都唔想食，每次只食十粒八粒，而且見佢都疴咗好多日爛便，見佢咁樣，即刻約見醫生

瘦到得番6 磅幾

 

檢血報告除咗紅血球有問題，其他都無咩嘢，醫生摸佢個肚話有啲實，感覺佢有啲痛，照咗X-ray，係有啲嘢，但睇唔到係邊個器官有事，最好係照吓超聲波，醫生幫佢打咗枝消炎針，開咗啲止痛藥、止大便藥畀佢，畀咗啲可以照超聲波嘅診所地址，約照超聲波

 

可能係打咗消炎針，胃口好番好多

 

 

但都想佢食多啲，會加啲吱吱肉醬畀佢

 

 

食咗止痛藥，連乾糧都食多咗，但食咗止疴藥，佢好似忍唔到大小便，係床度疴，所以我買咗張防水床墊墊住，連個貓砂盤都放埋上床，方便佢去大小便

 

平時我會係廳煲劇，依家我會係房用電腦睇，陪住佢，兼隔中餵佢食乾糧飲水，佢每次都飲好多水，有咁好服侍，佢依家都無出過房半步

 

依家夜晚都要同佢，仲有個貓砂盤一齊瞓

不嬲Charco 仔都係一隻好cool 嘅貓，唔多親人，依家佢唔舒服，瞓覺都主動黐住我，真係好耐無咁close

我一邊煲劇，一邊係旁邊陪住佢

有時佢瞓夠，又嚟黐吓我，瞓上我大髀，真係好耐都無試過

我陪住佢嘅時候，其他貓又會上嚟八吓，Chewy 會搵我討摸同梳毛

Charco 仔胃口好咗，食多咗乾糧，但有時又會扭食零食

見佢一食咗止疴藥反而仲差，所以已經停咗唔畀佢食，佢依家依然疴爛便，一日幾次，仲見佢成日舔肛門，舔到紅晒，不過啲便便已經無咁爛，已經約咗去照超聲波，下次報告畀大家知