Charco仔入室十六年

先講番Charco 仔嘅情況，早兩日已經帶咗佢去照超聲波，因為要照聲波，佢需要禁食，所以朝早佢無得食罐頭早餐，佢肚餓搵我攞嘢食，但又唔可以畀佢食

一入屋我已經即刻開罐頭畀佢食，佢差唔多食咗半罐

報告話佢應該係淋巴癌，啲癌細細粒，話都好難割除，見到個肝都有陰影，之前醫生話佢唔舒服都應該係有一般時間，可能就係佢開始成日匿係房，又成日唱歌嗰陣時開始，不過聽到係癌，我哋都諗住唔做任何治療，醫生開咗隻藥畀佢，已經訂咗，但仲未送到嚟，希望隻藥可以舒緩到佢會好啲

佢仍然鍾意瞓埋一角

有時夜晚佢會瞓我旁邊，但有時就鍾意瞓床尾

Mocha 嚟問候二哥嗎，有時都見佢唔用床上面個砂盤，會走出去厠所個砂盤大便

佢仍然疴爛便，我要成日阻止佢舔肛門，肛門度會有血水，唔知係佢啲便有血，定係佢成日舔肛門，舔到有血

呢兩晚我放毛毡被，佢就要墊住瞓

呢兩日都唔多肯食乾糧，只食幾粒，要扭零食，但我又唔敢畀多佢食，見佢唔多食乾糧，已經畀多咗吱吱肉醬佢食

尋日覺得佢疴少咗，尋晚我哋係廳睇電視，見到佢出嚟水機度飲水，後來仲跳上張摺凳度問我哋攞嘢食，畀平時啲乾糧佢唔食，要食“粒粒”健康糧

食完粒粒糧，仲主動去食乾糧

尋晚一放低佢就即刻嚟搓搓霸住張毛毡被

聽日係Charco 仔入室16 年，即係佢已經16 歲 ，好想見番佢以前活潑健康嘅Charco 仔

一見阿仔唔舒服，我都瞓得唔好，希望啲藥快啲送到，啲藥幫到佢，醫生話隻藥都可以幫到佢疴爛便

養得寵物都預咗佢哋會先走，呢幾年睇住佢食極唔肥之餘，仲瘦咗好多，一諗到要開始倒數佢哋嘅時間，真係好心痛