發現大肚貓

由前年係屋村個garden 帶咗Mocha 返屋企之後，都已經唔覺個garden 再有貓，連之前嗰隻三色貓都唔多見，直至到今年5 月又見番隻三色貓，不單見番隻三色貓，仲發現多咗幾隻貓

見到呢隻貓勁靚，應該係貓女嚟，又係好細細粒，好似Chewy 咁

之後仔仔爸就開始餵佢哋，其實garden 有個男人都有放乾糧畀佢哋，所以仔仔爸就隔日放罐頭畀佢哋食

呢隻禮服貓我覺得佢年紀有啲大，佢塊面、眼蓋有啲傷痕

我覺得呢隻貓唔太怕人，因為我見有人係佢身邊行過，佢都唔太驚，可能以前有主人，但被棄養

仔仔爸一直只放糧水，唔會同啲貓接觸

上個月尾，仔仔爸留意到隻靚貓女個肚凸凸，懷疑佢大咗肚，仔仔爸話之前都見過隻黑貓“騎”過佢

所以佢通知敏姐，叫佢搵啲義工嚟捉佢，以前呢度啲流浪貓，都係敏姐搵啲義工幫手捉貓絶育

早兩日敏姐話啲義工嚟捉貓，叫仔仔爸幫吓手，個義工講呢日只會捉隻貓女

但睇落貓女又唔覺肚大

最後都成功捉咗，個義工話遲吓會再嚟捉其他貓

今日仔仔爸放工泊好車，行過garden，又見到個義工，以為佢哋嚟捉其他貓，原來佢哋發現隻貓女有谷奶嘅情況，估佢已經生咗貓B，所以特登嚟睇吓，終於發現到呢5 隻小貓B，陰公囉，5 隻貓B 起碼兩日無奶食，仔仔爸目測5 隻貓B 都仲生存，佢哋仲有喵喵叫，希望佢哋可以繼續存活

後來個義工打電話畀敏姐，話啲貓B 已經送番畀貓女餵奶，義工仲話隻貓女好黐人，將來絶育後會幫佢搵領養

聽到呢啲消息真係好開心，依家希望5 小B 可以平安長大，我諗如果遲多一日，啲貓B 一定會餓死，仔仔爸問個義工幾時會嚟捉其他貓，個餵貓男人話佢會take care 其他貓，但仔仔爸話，呢度一日有貓，啲衰人見呢度有貓，又會棄貓係呢度，所以叫啲義工嚟捉走佢哋，最後個義工話下個星期會嚟再捉貓，會幫佢哋治療，而且我都唔希望再有流浪貓係街流浪