帶貓地行街街

一直以o黎，仔仔爸都想帶貓地出街，某日佢行過間平價商店，見到啲狗胸帶同拖繩都好平，就買咗返o黎

相中條胸帶係大碼o黎，但之前佢買o既係細碼

當晚就搵啲貓o既試吓，先搵Marble仔試帶，呢個size 對佢應該係細咗，一來箍實唔舒服，二來本身貓地都唔鍾意有嘢箍實

佢都唔願郁、唔肯行

只想搵掟匿

輪到天師仔，都係一樣

尋日仔仔爸就攞條胸帶去換size，後來佢o黎接我收工，佢等我收工時，我見佢係我公司個倉厠所濕布巾抺個司機位，當我坐上副司機位，佢問我臭唔臭，我問佢係咪踩狗屎，之後佢指一指車後坐話係“佢”o既傑作

我一望，好“實派”，原來佢帶埋Marble 仔o黎接我收工，佢話Marble仔驚到坐上佢大髀疴咗屎，哈哈

跟住我上後面陪佢坐，佢就黐實我，佢定咗啲無咁驚

 

其實佢都仲係好緊張

返到停車塲，抱佢落咗車，都係唔願行，仲想匿入車底

唯有抱佢，之後再試放落地，都係唔肯行

 

唯有再抱，直至到屋企樓下，再放落地

帶佢上樓梯，初時都行得好快

之後又唔想行

終於認得返屋企個方向

入咗屋，就即刻同佢抺身抺手腳，佢好不滿，一邊“胡胡聲”，仲fee 人

之後就匿咗係凳底

今朝早，仔仔爸襯我未起身，自己帶奇哥仔落街，又係唔敢行，所以好快就帶佢返屋企

條胸帶對佢o黎講大咗啲，好鬆

返上o黎我幫手抺手腳，佢又再帶天師仔出去，我又跟住去

 

基本上都係一樣，唔肯行，所以好快又帶佢返屋企

其實想佢哋唔怕出街，係應該好早期就開始多啲帶佢哋出去習慣吓，至會無咁驚去街，好似天師仔咁，佢雖然以前都係喺屋企樓下生活，但都已經帶入屋生活咗咁多年，再帶佢哋出去就一定會驚，其實我都唔鍾意仔仔爸帶佢哋出去，一來貓地又驚，二來外面又唔乾淨，不過我講佢都未必會聽