去玩貓

呢日又一早瞓醒自己走去食早餐，呢日唔食茶餐廳，去食豬紅魚片粥同炒麵

等埋三家姐、姨甥孫起身，跟埋三家姐去西灣河開工，因為有貓玩喔，我哋先到太安樓食車仔麵

一入屋就見到佢，我慢慢接近佢，所以無嚇親佢，佢都肯比我摸

呢隻唔怕人嘅老貓，係房瞓緊覺

仲有隻超怕人嘅肥貓，一聽見我哋嚟就已經匿埋係按摩椅後面了，舊年跟三家姐嚟開工，佢又係匿係呢度，但佢上次匿得好入，恨本都睇唔到佢個樣，今次佢匿得無咁埋，可以睇清楚佢個樣啦，佢有粒八婆廛架，好得意呀

再去摸摸白貓，佢其實好鍾意人摸

我嘗試伸手摸吓隻怕羞貓，原來佢好鍾意人摸架，但佢點都唔肯出嚟，所以唯有辛苦啲，一直伸手入去摸佢

 之後黑白貓瞓醒就走出廳

睇吓個儍妹當自己係貓嗎，哈哈

我臨返紐約前，三家姐話呢隻老貓有腎病入咗醫院，唉，貓貓一有腎病就手尾好長，希望佢主人悉心打理佢，等佢可以舒服啲活多幾年

呢一朝好姊妹阿Pat 嚟搵我食早餐，因為呢日要幫手睇住o靚妹，驚佢唔跟我，咪搵佢幫手一齊湊

等埋我姨甥仔出咗門，我同阿Pat 一齊帶咗o靚妹落樓下玩瀡滑梯，玩咗個幾鐘，返上樓氹佢瞓覺

三家姐返到嚟，我哋就一齊落樓下大快活食下午茶，我要食邪惡嘅西多士，不過啲西多士無花生醬都係無咁好食

呢晚我哋去咗我阿姨屋企食飯，阿姨煲咗花膠湯我飲，仲有鮑魚仔食，一見到咁豐富嘅住家飯，都唔記得影相o忝😜

另一朝，等埋三家姐一齊至去食早餐

而呢一晚，約咗另一個姨甥女(我四家姐個女)出嚟食飯，佢住李鄭屋村，所以就佢係長沙灣食，我哋去咗尚點食上海嘢

姨甥女話佢大個女出嚟做嘢，可以請阿姨食飯，真係乖女，之後我請番佢去食糖水

呢日三家姐要返工，姨甥女要去睇醫生，要幫手睇住個o靚妹，開Disney Channel俾佢睇，後來佢自己咁樣就瞓著咗😂😂

個o靚妹瞓咗，我摷我姨甥啲書出嚟睇

等三家姐返嚟，就落街食雲吞麵

之前嗰晚同姨甥女食完飯，第二晚又繼續約出嚟食，今次叫埋我大家姐，因為我大家姐同我四家姐係一齊住的，呢晚都係就佢哋去長沙灣食，我哋去呢間度打邊爐

我哋都唔食得辣，叫咗藥膳清湯

隔離有間寵物店，啲貓B好得意呀