澳門行 — Day 1

姨甥女係永安旅遊搵到去澳門嘅優惠套票好抵玩，所以決定去玩兩日，今次我叫埋我二家姐一齊去，除咗同二家姐去過啲香港一日遊之外，我真係未試過同二家姐去旅行，因為我二家姐係啲唔搭得飛機、唔搭得船嗰嘅人，可能二家姐都覺得未同我去過玩，俾面同埋我哋一齊去，而且佢話佢上次去澳門，已經係佢個大女18歲嗰陣，可想而知佢都真係好多年無去過澳門

呢日我哋搭早船，所以要一早起身去信德碼頭，先食番個早餐，等埋二家姐到，齊人就上船

二家姐真係唔搭得船，我哋坐金光飛航，我覺得好隠定，一啲都唔拋，但佢都嘔咗一次，今次係去氹仔嗰邊個新碼頭落船

我哋係搭碼頭坐賭場、酒店啲Shuttle Bus 去新濠影滙酒店

因為咁早未有房攞，所以先放低行李寄存，套票包咗酒店個摩天輪，所以先去坐，好彩o靚妹還差一個禮拜至夠兩歲，仲可以免費坐

套票又包咗兩個百老匯大街食肆餐卷，我哋又再搭Shuttle Bus 去百老匯大街

啲餐卷只可以去指定餐廳同食指定餐點，我自己用咗一張餐卷食咗呢個套餐，而佢哋就走咗去食馬拉嘢

仲有一張餐卷就換咗呢個酸辣粉，咁就每人食少少，唔好嘥咗張餐卷

食飽就坐Shuttle Bus 返酒店攞房，啲房好正呀

另一間房仲面向澳門巴黎人個艾菲爾鐵塔

個套票仲包咗兩張4D「蝙蝠俠夜行飛馳」，最後決定我同細妹兩個去玩，真心覺得好刺激

玩完返上房join 番佢哋，就過隔離澳門巴黎人度行吓

個套票都包咗上艾菲爾鐵塔上平台嘅門票

個塔啲燈會隨住音樂轉顏色，好靚o架

個「咸蛋黃」都好靚

之後我哋去官也街搵食，我哋去咗食水蟹粥，都唔係好肚餓，所以只係叫咗少少嘢食

我哋去莫義記買埋木糠蛋糕、大菜糕至返酒店沖涼瞓覺