頂癮

早排我睇咗“深夜食堂”、“孤獨的美食家”，比佢哋啲美食引到流晒口水，有時見佢哋食餃子，咁我有時又走去買餃子食，再配多個酸辣湯

一見佢哋食壽司，又忍唔住了

睇日劇見佢哋食飯糰，又去買嚟食，仲特登走去買中華沙律配埋一齊食

睇韓劇成日見到佢哋食煎餅，不過我就無去韓餐館買，反而想食蔥油餅，不過呢間麻麻地，一來煎過籠，二來始終唔係即煎即食，買咗返屋企至食，又凍咗啲，味道當然更加大打折扣

仲有成日見韓劇食即食麵，我就最鍾意食呢隻韓國麵，我自己加咗啲金菇菜同木耳絲落去

仲有見佢哋食炸雞呢，所以上次其實係我特登叫阿姐買炸雞返嚟食的

有時係Facebook 見啲Face 友post 美食，見佢哋食雲吞麵，搞到我又想食，其實我可以去肉店買已經包好嘅雲吞，再自己買生麵返嚟整，不過我咁懶，梗係買現成嘅返嚟食啦

某日見個Blog 友post 自家制油條，又搞到我好想食，疫情前仔仔爸休息日會去買粥、油條、腸粉返嚟做早餐，依家星期日都係自己整早餐食，所以某日我自己去買嚟食

阿姐鍾意食豆腐花，所以上個月阿姐返嚟返工，我買定豆腐花返嚟，比佢放工返嚟食

講開糖水，而家係唐人街都買唔到中式糖水，唯有買呢啲即食糖水頂吓啦

試過幾款芝麻糊，係呢個牌子最好食

今年咁啱冬至阿姐係屋企，雖然無特登做節，但買咗湯圓返嚟同阿姐一齊分享，仲係阿姐自己煮比我食，佢再加埋芝麻糊做底

我又鍾意食咖喱角，所以有時食完飯去買餸，順便買個返嚟做下午茶

我又好鍾意食芙蓉蛋飯，不過唔係好多餐館有呢個餸，平時食開嗰間餐館，因為疫情一早就執咗，所以好耐都無食過，姨甥女知我鍾意食，某日佢post 張芙蓉蛋飯嘅相比我睇，真係比佢引屎我