天師仔的近況

每次見到天師仔打乞痴噴到一地血，真係好擔心

見佢左眼個第三眼簾走咗出嚟

個鼻依然好多分泌物流出嚟

早排仍然鍾意匿埋瞓覺，尤其係衣櫃入面

佢又想返入衣櫃

不過近排佢已經無咩匿係衣櫃，多數係廳瞓，一來可能天氣熱係衣櫃焗啦，二來我依家係廳煲劇，就引佢係廳陪住佢，摸佢、錫佢、拍佢pat pat，所以佢見我成日陪住佢，佢依家都唔多匿埋

我坐係梳化睇電視，佢都會主動跳上梳化陪我

直至到佢眼瞓想瞓覺，佢會自動行入個籃度瞓覺

就算我唔得閒係廳陪佢，佢都會自己留係廳度，無再匿埋 

 不過夜晚佢仍然會去厠所瞓覺

上個星期見佢左眼蓋腫咗，腫到隻眼都細咗，好驚係啲癌細胞擴散

係上面同側面都睇到好明顯腫咗

好彩過咗兩日見佢又消咗腫，我真係鬆咗一口氣，我估係啲分泌物谷住，所以我情願佢流多啲分泌物，都唔好谷住，可能個鼻多分泌物，所以有時會見佢張大口，用口呼吸

依家早晚都會用靈芝粉開水比佢飲，之前要灌佢飲，但我依家加咗肉汁汁零食係啲靈芝水度，佢肯自己食

見呢個方法佢肯自己食，所以見買二送一，即刻order 入定貨

依家佢仲會期侍仔仔爸畀靈芝水加肉汁汁呢

天師仔除咗期待飲靈芝水，佢每日最期待係仔仔爸同佢梳毛、拍pat pat，仔仔爸沖緊涼，佢已經係度等

見佢依家唔再主動去飲水，唯有早晚罐頭餐，加多啲水比佢，等佢補充多啲水份

佢真係瘦咗好多，不過佢仲肯食乾糧，佢除咗自己食，我週不時都會自動畀乾糧佢食，我用手餵佢，佢又會食多啲，我想佢食多啲嘢，咁抵抗力都會好啲

佢仲算好活躍，仲肯玩吓

總括嚟講，佢雖然瘦啲，但精神都算好好，近排見佢打乞痴噴血情況都少咗，希望可以一直keep  住，我真係唔想佢咁快離開我