Animal Friends 動物朋友

之後圓丸媽帶我行去西營盤，我都係第一次踏足西營盤

去佢成日幫手做義工嘅 Lap 貓咪領養中心度睇吓，（原本上次應承嚟呢度幫手，點知又打風）

當時裡面有好多人睇緊啲領養貓，所以無入去睇，最後見到有一外籍家庭領養咗隻名種貓

跟住圓丸媽又帶我行去另一笪地方，話嗰度幾乎每個星期Animal Friends 動物朋友呢個機構，都會帶待領貓狗搞領養日，好多時圓丸媽都會嚟幫手

仲有幾隻好得意嘅唐狗仔，啲狗仔好活潑好得意呀

啲狗仔玩到攰要瞓覺，睇隻黑色狗隻腳long 咗係隻啡狗身上，so cute

我捐咗小小錢至走，希望啲毛孩子，快快比人收養，成為幸福兒，跟住圓丸媽再帶我週圍去行吓

圓丸媽送我去西營盤站搭地鐵，臨走前仲送咗啲小禮物比我，真係唔好意思，我都無準備嘢送比佢同佢家中大貓，（圓丸係2015年時已經去咗彩虹橋)，家中只剩大貓一隻，圓丸媽之前又係屋企暫託貓B，早排就暫託狗狗，所以其實佢都幾忙o架，多謝佢抽時間陪我週圍去

我搭地鐵返大窩口，就諗住call 姨甥女兩母女落街食嘢，點知佢又唔聽電話，咁我咪係樓下食咗碗車仔麵至返上去

 
點知原來佢兩母女瞓鬼咗覺，咁等埋三家姐返嚟我哋至再落樓下搵飯食

呢晚細妹收咗工上嚟瞓，因為佢第二日休息，第二朝等佢哋瞓到飽就去悅來坊飲茶，我細妹好鍾意飲茶，我對飲茶就麻麻地，但細妹鍾意點都要就吓佢

飲完茶，細妹同姨甥女去咗太子睇中醫，呢日我姨甥唔舒服無返工，係屋企瞓覺，我湊住個衰妹，費事嘈住姨甥休息，先帶佢去瀡滑梯，佢只會跟我去瀡滑梯o架咋，不過佢玩夠會識行番屋企，係佢帶我返屋企，咁靜靜地陪佢玩陣玩具，姨甥仔瞓醒，就開樽奶“質”佢瞓晏覺，佢瞓咗我就舒服晒，哈哈

等細妹同姨甥女返嚟，我話想食雲吞麵，就落樓下馬仔記食雲吞麵做下午茶

呢日三家姐開工，係顧主屋企執咗個架返嚟

個架我覺得啱我二哥用，因為我二哥好鍾意砌模型車，啱佢放啲小零件同工具，咁我就send 相問佢要唔要，佢覆我話要，但要我第二朝攞比佢，都好啦，鬼叫我係閒人一個咩，咁第二朝，早啲啲起身就搭地鐵去天后，二哥係地鐵站等我

經過蓮花宮

佢先同我去茶記食個早餐（又係雪菜肉絲米呀）

跟住就跟二哥返屋企，我都係第一次去二哥勵德村屋企，行過間齋舖小店，阿哥話食砵仔糕，買咗一人一個

係二哥屋企坐咗一陣就走，唔阻阿哥瞓覺，因為佢係報館返夜晚，（所以幾乎佢每次都係朝早至會蒲頭）我沿住條路行番去地鐵站

比我昅到有間天后古廟，又走去打個白鴿轉

搭地鐵時諗吓唔想返大窩口，咁就坐到去深水埗，行吓深水埗、鴨寮街，去公和食咗豆腐花，以前成日去食，以前只得煎釀豆腐，依家多咗其化款式

之後去咗大坑東個朋友屋企坐吓，個朋友已經退咗休，成日去旅行，睇吓佢去各地方嘅旅遊相，後來朋友老公返咗嚟，我就告辭返大窩口，我已經諗定呢晚去邊間食晚飯，所以約定三家姐、姨甥收工自己到，我就返去接埋姨甥女兩母女先去

點知食完呢間幾日後，發現關咗門裝修