中環摩天輪

呢朝同埋三家姐湊埋o靚妹落茶記食早餐，帶住o靚妹去食早餐，一定係食通心粉，而我只會食雪菜肉絲米，或者五香肉丁米、米線

之後三家姐要返工，姨甥女又要去覆診，我又要獨自對住o靚妹幾個鐘，諗住帶個o靚妹落樓下玩隨滑梯，佢初初唔肯跟我，我send 相比佢我姨甥女話︰佢唔肯跟我落街，姨甥女回我︰話我係拐子婆

後來個o靚妹自己死死氣肯著鞋跟我落街，我回姨甥女話︰我拐帶成功，嘻嘻

玩到姨甥女返嚟搵我哋，我二哥又肯呢個鐘數浦頭，因為佢知道我約咗好姊妹阿Pat 兩公婆，去綠楊新邨蓮香棧飲茶，二哥嚟見吓我、陪吓我，阿Pat 老公係附近返工，所以就埋佢食Lunch

經過麥記，見門口賣朱古力軟雪糕唔駛排隊，一於整番杯先，我只係想食面嗰啲脆脆朱古力，$6 一杯又真好抵食

蓮香棧，賣點又係懷舊點心，不過啲嘢就麻麻囉，個咖喱魷魚就好食

食完阿Pat 話同我去中環坐摩天輪，因為佢夜晚約咗個澳洲返嚟嘅親戚係中環食晚飯，依家摩天輪$20 坐一次又真係幾抵玩

 啱啱旁邊做緊香港美酒佳餚巡禮，不過我又唔好飲酒，所以無入場行吓

玩完摩天輪，阿Pat 陪我去買香港明信片，係阿姐落order 要買，仲要幫佢寄埋比佢個同事，要行到去石板街嗰邊至搵到一間專賣遊客手信嘅店舖

買完就週圍行吓

都唔知再去邊度好，想搵個地方坐吓，但又唔想坐茶餐廳食茶記嘢，最後我見到茶木，可以食甜品，正

坐到阿Pat 老公收工嚟搵我哋，我自己就搭港鐵返大窩口，嗰晚返到去，三家姐同姨甥女食咗少少嘢做晚餐，話等到十點落平台食宵夜三寶套餐，個宵夜三寶有豬膶雞粥、炒麵、同釀尖椒

不過當晚雞粥無豬膶，但好多雞，無釀尖椒，改咗個唔知咩骨