沙田BBQ

呢朝先同三家姐、姨甥去茶記食早餐

我終於食其他嘢，唔再係雪菜肉絲米或五香肉丁米線

食完又要帶個o靚妹去幼稚園Interview，等佢哋Int 完，姨甥女仲要去聽講座，我同三家姐先帶個o靚妹返屋企，等姨甥女返嚟，我同佢帶埋o靚妹入天水圍去我好姊妹阿Pat 屋企坐吓，呢度佢新搬嚟，我都未嚟過，上到阿Pat 屋企，個衰妹扭眼瞓，連我姨甥女都瞓埋一份

每次去親阿Pat 度，佢都會幫我做facial，咁啱我契女由澳洲放暑假返嚟，契仔又唔駛返工，我哋帶埋尋晚唔記得食嗰個蛋糕去一齊食

食完蛋糕hea 多陣，又夠鐘出去，我哋約咗另一個好姊妹阿芬去深井食飯，阿芬年頭時佢老公突然中風，佢一直都要多啲時間照顧老公，所以我已經返香港成個月有多，佢都無時間見我，今次就就佢去佢屋企附近間酒樓食

見阿芬老公已經好番好多，只係仲需要用扶手扙幫助吓行路，一直有做物理治療，進展得好好，阿芬話我臨走前會再食一餐，見多次面

呢日星期日，佢哋一定做爛瞓豬，我又自己去食早餐，我走去食粥，又想食腸粉，又想食炒麵，預咗自己實食唔晒，帶定個盒去打包啲炒麵，我幾醒，哈哈

食完返上去，自己煲電視劇，唔理佢哋，佢哋瞓醒自己去食嘢，下午我哋一齊去沙田我阿姨屋企BBQ，姨甥女見姨婆住村屋，一直想去人哋屋企BB蕉，所以搵我做藉口囉，咁我又真係好耐都無燒過嘢食，咁見多次阿姨一家又無妨，係咪

阿姨就住係龍華酒店附近，我哋先去龍華買乳鴿上去一齊食

帶o靚妹睇白鴿、孔雀

有隻怕人貓，我只可以丟啲零食過去比佢食

去到阿姨屋企，就ready 開爐燒嘢食，阿哥準備好多嘢食喔，真係多謝晒

個o靚妹就開心啦，有得玩，仲有阿哥兩個小朋友同佢玩

一直燒到天黑至走