修甲師

上個星期約咗去拜山，咁阿姐就返嚟一趟，我當然準備定新床舖，貓地都乘機攤住等阿姐返歸

星期五佢放工就揸車返嚟，但佢約咗好姊妹Tracy 食生日飯，好夜至返

 
第二朝，阿姐話我知Mango 仔上床同佢瞓咗一陣

阿姐瞓醒再同Mango 玩

係屋企食咗早餐至出門去拜山，見到阿姐表哥，記得之前我提過大姑奶屋企後yard 發現4 隻貓B 嗎﹖表哥話嗰幾隻貓已經大隻咗，仲成日走去踩上佢架車度，我哋見佢架車真係有好多貓腳印

平時拜完山就返屋企，但傾開計話Flushing 啱啱開咗間DAISO，阿姐見表妹要去Flushing 睇中醫，不如順便一齊去行吓，星期六，去到都要排隊，不過都唔算排好耐，其實都好細間，咪係香港AEON $12 店嘅貨色，不過都係要貪得意去睇吓

行完個商場，一齊去食韓國嘢，經過食店前，表妹帶我哋去睇流浪貓，嗰度係地鐵路軌附近，表妹話嗰度有好多流浪貓，不過有人會去餵食，當時只見到一隻好親人的灰貓

出門前無諗過會咁遲至返屋企，所以無特登放多啲乾糧，一入屋行入廚房就見到咁…

一定係Mango 仔，其實佢都唔係第一次摷垃圾筒

咁無晒嘢食，餓親班主子，都係我哋唔啱，咁就梗係即刻開餐比主子食啦

星期日一早，六貓已經係度等早餐，見到五位公子好齊心，Chewy 就係廚房窗台度等

天師食飽早餐去叫阿姐起身

阿姐食完早餐，又入我房幫我整嘢，阿姐要親多啲個女

啲貓地係附近捕住

阿姐捉住Mango 仔狂抽水，Mango 仔個樣真係好搞笑

之後我陪阿姐去超市買嘢，同佢去食咗個Lunch

食完Lunch 就返屋企，阿姐執齊嘢就早啲返去

阿Pat 有個朋友返咗香港，所以佢要幫朋友湊住隻貓兩個星期，之前阿Pat call 仔仔爸幫手同貓剪指甲，原本約咗星期六晚，但嗰晚我哋又遲返，又要餵貓，所以約咗呢日我哋食咗晚飯至去佢屋企幫手

貓地叫Tommie，好靚仔喔，初時我哋靜靜入屋佢都係門口八，我比隻手佢，佢都嗅吓，但一入到大廳，佢就跳上窗台

佢匿係窗簾後面裝我哋，比嘢食都唔肯出嚟

 後來仔仔爸引佢行出嚟至格硬捉佢剪指甲，佢啲指甲勁尖

一剪完就即刻匿係窗簾後面，直至我哋走咗之後，佢先至敢出嚟，阿Pat sent 相比我哋睇 

我哋返到屋企，阿姐都send 相話比我哋知佢已經返到屋企